ភ្នំពេញ៖ សមត្ថកិច្ចបានឃាត់ខ្លួនបុរសម្នាក់ដែលទាញកំាភ្លើងបាញ់បណ្តាលឱ្យបុរសម្នាក់រងរបួស បង្កការភ្ញាក់ផ្អើលដល់ពលរដ្ឋក្នុងខណ្ឌពោធិ៍សែនជ័យកាលពីរសៀលថ្ងៃទី០៨ ខែវិច្ឆិកា ឆ្នាំ២០២២ នៅតាមផ្លូវលំ ស្របផ្លូវរថភ្លើង ក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ។

នៅមុនពេលកើតហេតុ ជនបង្កបានជិះឡានចាកចេញកន្លែងផឹកសុីនៅក្បែរផ្ទះទាំងស្រវឹង ដោយបានជិះកៀរពលរដ្ឋ។ លុះដល់ពលរដ្ឋសាកសួរនាំ អ្នកបើកបរនោះស្រាប់តែដកកំាភ្លើងខ្លីមួយដើម បាញ់ផ្ចុចដីប្រឡោះជើងចំនួន២គ្រាប់ នៅវេលាម៉ោង២រសៀល ថ្ងៃទី ០៨ ខែវិច្ឆិកា ឆ្នាំ២០២២នៅតាមផ្លូវលំ ស្របផ្លូវរថភ្លើង ក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។

បន្ទាប់មកជនបង្កបានបើកគេចទៅបាត់។ លុះដល់យប់ថ្ងៃកើតហេតុដដែល សមត្ថកិច្ចបានឃាត់ជនសង្ស័យ និងបក្ខពួកម្នាក់ទៀតផងដែរ ដល់ផ្ទះដែលស្ថិតនៅបុរីឈូកវ៉ា២ ភូមិតឹក្ខប្បញ្ញោ សង្កាត់សំរោងក្រោម ខណ្ឌពោធិ៍សែនជ័យ។ រួមទាំងដកហូតបានអាវុធខ្លី និងរថយន្តម៉ាក Jeep។

តាមប្រភពបានឲ្យដឹងថា កន្លងមកគេធ្លាប់ឃើញជនបង្កធ្លាប់ត្រូវបានសមត្ថកិច្ចឃាត់ខ្លួនម្តងរួចមកហើយពាក់ព័ន្ធនឹងការបាញ់សម្លាប់សង្សារស្លាប់ក្នុងរថយន្តនៅឆ្នាំ២០២០នៅខេត្តកំពង់ឆ្នាំង។ ក្រោយមកពលរដ្ឋបានឃើញថា ជនបង្កត្រូវបានអាជ្ញាធរឱ្យនៅក្រៅឃុំវិញ ដោយតែងតែសង្កេតឃើញថា ជនបង្កចេញចូលផឹកសុីនៅផ្ទះមួយកន្លែង ហើយពេលដែលស្រវឹងម្តងៗ តែងតែកាន់កាំភ្លើង ច្រងែងច្រងាងស្រែកឡូឡា គំរាមពលរដ្ឋក្នុងភូមិ ធ្វើឲ្យពលរដ្ឋភ័យខ្លាច។

បច្ចុប្បន្នជនបង្កត្រូវបានអាជ្ញាធរឃាត់ខ្លួន ដើម្បីបន្តការដោះស្រាយតាមនីតិវិធីច្បាប់៕